PRELUDIO IN TE L'ERBA

A primmaveja a preludia
con di motivi invernali:
fiorisce e amendoe in ti orti
e o persego ne-o mœ giardin,
ma ciêuve se l’è o çë malinconico
commo in to giorno di morti.

Sbraggia unna ræna ;m’arriva
lento un profumo bagnòo;
fra e ramme secche do figo
zà o roscignêu o gh’à cantòo..

Ma se un barlumme do sö
o chinn-a a brillä in ti laghetti,
arriva unna rafega zeä
che subito a vegne a serrä,
brutta maligna intrigante
o baronetto de sö!...

Pä che o mondo s’aççende e o se smorte
in sce-o zêugo de un interruttö…
pä ch’o mêue e ch’o torne e rinasce
pä che a vitta a bäsighe coä morte.

Oh povòo chêu che ti batti
Fere unna risata e un sospìo!
L’è fra un barlumme de sö
e unna pennombra che ammïo
questa mæ vitta corrï.
Mille votte mi mêuo e rinascio
in sce-o zêugo de un interruttö;
o sprofondo in te onde letee
o me scanso con l’animo a-o sö.

Cose ne posso mi se
devotte me säta l’axillo
de fä un pittinin comme o grillo
quando de nêutte ä rosä,
in ta prixion da gaggetta,
o gratta a so chitaretta
e o se spascionn-a a cantä?
EDOARDO FIRPO